Nedim Kasideler

1 – Kasîde-i Nedîm Çelebi Der-Na‘t-ı Resûl-i Ekrem ve Habîb-i
Muhterem1

  1. Şâh-bâz-ı evc-i kurb-ârâ habîb-i kibriyâ
    Bülbül-i gülzâr-ı ev ednâ habîb-i kibriyâ
  2. Câm-ı mevvâc-ı hidâyet neşvenin mestânesi
    Feyz-yâb-ı sâgar-ı ma‘nâ habîb-i kibriyâ
  3. Âlem-i feyz-i Hudânın sâkin-i mey-hânesi
    Pâdişâh-ı hüsnde vâlâ habîb-i kibriyâ
  4. Zerredir aşkında şekl-i müstedîr-i nüh-kıbâb
    Âftâb-ı nûr-ı şer‘-efzâ habîb-i kibriyâ
  5. Cebra’il ol şem‘-i bezm-i vahdetin pervânesi
    Nûr-bahş-ı meclis-i ulyâ habîb-i kibriyâ
  6. Hâkdır râh-ı gam-ı hicrinde mâh u âftâb
    Neyyir-i eflâk-i istiğnâ habîb-i kibriyâ
  7. Akl-ı küll sevdâ-yı bend-i zülfünün dîvânesi
    Âb-ı rûyı cevher-i eşyâ habîb-i kibriyâ
  8. Kahrın etdi hânumân-ı Lât u Uzzâyı harâb
    Sâhibü’s-seyf-i cihân-ârâ habîb-i kibriyâ
  9. Oldu lebrîz-i ecel a‘dâ-yı din peymânesi
    Tîğin etdi hükmünü icrâ habîb-i kibriyâ
  10. Enbiyânın ferd-i mümtâzı resûl-i kâm-yâb
    Cem‘-i a‘yân içre müstesnâ habîb-i kibriyâ
  11. Şâh-bâz-ı zâtının arş-ı Hudâdır lânesi
    Cilve-sâz-ı âlem-i bâlâ habîb-i kibriyâ
  12. Sûsen-i şemşîr-i sıdkın innehu şeyün acîb
    Perçem-i tûğı zafer-fehvâ habîb-i kibriyâ
  13. Düşmen-i derd-âşinâ vü sıhhatin bîgânesi
    Saff-ı a‘dâda gazâ-pîrâ habîb-i kibriyâ
  14. Zülf-i adl-i şer‘i rûy-ı fitneye müşgin-nikâb
    Taht-ı hilm ü şefkate Dârâ habîb-i kibriyâ
  15. Lutf ile kıl merhâmet çün kalb-i pür-vîrânesi
    Pes harâb-ender-harâb-âsâ habîb-i kibriyâ
  16. Murg-ı aklı kaldı dâm-ı fikrde nâdir-i savâb
    Çeşm-i hak-bîn oldu nâ-bînâ habîb-i kibriyâ
  17. Oldu hayfâ pîrezen-dehrin gönül dîvânesi
    Zülf-i mekrinden verüp sevdâ habîb-i kibriyâ
  18. Etdi da‘vâ-yı ubûdiyyet dil-i kemter-cenâb
    Hüccetin lutfunla kıl imzâ habîb-i kibriyâ
  19. Yâ nesi var hazretinden gayri onun yâ nesi
    Eyle şâyân-ı şefâ‘at yâ habîb-i kibriyâ
  20. Verd-i haddi ziynet-i gülşen-serâ-yı mürselîn
    Serv-kaddi cümleden a‘lâ habîb-i kibriyâ
  21. Kâkülü cennât-i hüsnün sünbül-i sad-dânesi
    Bûy-ı ahlâkı abîr-âsâ habîb-i kibriyâ
  22. Nâ-sezâdır vasfına şi‘r olsa da sihr-i mübîn
    K ‘oldu meddâhın senin Mevlâ habîb-i kibriyâ
  23. Bâ-husûs olsa Nedîm-i mücrimin efsânesi
    Eyledi mağbûn onu dünyâ habîb-i kibriyâ
  24. Ey nübüvvet mülkünün sultân-ı levlâk-efseri
    Vey şefî‘ü’l-hulk-ı mevlânâ habîb-i kibriyâ
  25. Deşt-i rahmetde şefâ‘at bahrinin dür-dânesi
    Tâc-ı arşa lü’lü-i lâlâ habîb-i kibriyâ
  26. Hazretindir ceyş-i İslâmın delîl ü rehberi
    Râh-ı hakda hâdî-i dânâ habîb-i kibriyâ
  27. Nat‘-ı garrâ-yı hicâzın server-i ferzânesi
    Ehl-i dîne şâh-ı bî-hemtâ habîb-i kibriyâ
  28. Bâğ-ı rezme rumhi serv-i cûybâr-ı ahmeri
    Şehper-i derd-i ser-i a’dâ habîb-i kibriyâ
  29. Şâhid-i şemşîrinin çeşm-i adû kâşânesi
    Yekke-tâz-ı sahn-ı mâ-evhâ habîb-i kibriyâ
  30. Tab‘-ı âciz kande kande midhat-i peygamberi
    Na‘tini etdi velî imlâ habîb-i kibriyâ
  31. Serverâ ma‘zûr ola bu kâr-ı küstâhânesi
    Eyleme redd eyleyüp rüsvâ habîb-i kibriyâ

2- Kasîde Der-Sitâyiş-i Ali Pâşâ

  1. Başlayup cûşişe tab‘ımda mezâyâ-yı sühan
    Mevc-hîz oldu yine lücce-i deryâ-yı Aden
  2. Hüsn-i matla‘da edüp çeşme-i mihri rîzân
    Eyledi hükmünü icrâ yine tab‘-ı rûşen
  3. Safha bir lahzada hârûtsitân oldu yine
    Turfa efsûn okudu bu kalem-i câdû-fen
  4. Oldu mi‘mâr-ı hüner şâhid-i endîşem içün
    Böyle bir hâne-i âyîneye bünyâd-efken
  5. Nice şâhid ki hırâm eylese râhında durup
    İşve vü nâz u niyâz ile çekerler gerden
  6. Pâyine rîhte yüz şerm ile sad âb-ı hayât
    Her ser-i mûyuna âvîhte bin Çîn ü Hoten
  7. Bârekallah yine hem-hâlet-i meh-tâb etdi
    Hüsn-i Leylî-i mezâmîni bu yek-reng peren
  8. Reng reng etdi çerâğındaki pertev bezmi
    Mağz-ı tâvûsdan almış gibi tab‘ım revgan
  9. Tûtî-i nâtıkama nisbet ile Bebgânın
    Nağme-i nazmı hem-âvâze-i feryâd-ı zagan
  10. Şeh-i nev-sikke-i nazmım ki benim mülkümde
    Zer-i hurşîd ise de nâ-seredir nakd-i kühen
  11. Benim ol hâce-i bahşende ki harc etsem olur
    Encüm-i çarhı güher yerine mahzen mahzen
  12. Etmem endûhte-i gayre heves çün pervîz
    Açdı Ferhâd-ı hayâlim bana bir nev-ma‘den
  13. Nice ma‘den ki cihân oldu dem-i kâvişte
    Bu şerer-pâre ser-i tîşe-i endîşemden
  14. Açılup tâb-ı temûz ile o gül pîrâhen
    Gelmiş âgûş-ı girîbâne şikâf-ı dâmen
  15. Yakdı yandırdı bizi muhrıka-ı sîm-âsâ
    Mihr-i ruhsârı olup sînesine pertev-zen
  16. Çehler-i tâb-ı temûz eyledi bî-âb ammâ
    Oldu lebrîz gül-âb-ı der ile çâh-ı zekan
  17. Dökülüp rûy-ı arak-nâkine şâdâb oldu
    Tâze sünbül gibi ol kâkül-i pür-çîn ü şiken
  18. Sâkiyâ pertevi câmından alırken hurşîd
    Çeşmimiz târ ede lâyık mı şeb-i derd ü mihen
  19. Yok mu bir handeye kurbânın olam cây meger
    O kadar teng midir gonca-i nev-hîz-i dehen
  20. Ohşayup gabgabın el sevdiğim insâf mıdır
    Âşıkın dâğına der-kâr ola nevk-i nâhen
  21. Gâh ol şûhu gehî tab‘ını vasf eyleyerek
    Bilirim kasdını billah Nedîmânın ben
  22. Olmak ister yine bir tavr-ı nev-âyîn üzre
    Vasf-ı Pâşâ-yı Ferîdun-hâşeme tarh-efken
  23. Kâr-bend-i dihîş ü dâd Ali Pâşâ kim
    Harc-ı yek-rûzesi mahsûl-ı Bedahşân u Aden
  24. Seyf-i meslûl-ı celâlet ki düm-i şemşîri
    Zafere âb-ı bekâ fitneye berk-ı hırmen
  25. Saf-şikâf ü sipeh-ârâ k’olmaz tâs-ı sipihr
    Bir sipâhî kulunun farkına hûd-ı âhen
  26. Sadr-ı Cem-kevkebe kim na‘lçe eyler bulsa
    Mûze-i pâyine ebrûlarını Rûyinten
  27. Tâk-ı gerdûnuna vâlâ-yı şafak pûşîde
    Zevrak-ı haşmetine atlas-ı gerdun yelken
  28. İbn-i Hâcib harem-i fazlına derbân-ı kemîn
    Mîr Sadrın serine mevkıf-ı na‘li me’men
  29. Âsman bister-i ikbâline gûy-ı micmer
    Meh şebistânına bir şema‘-ı pirûze-legen
  30. Ümm-i ikbâle püser silmî-i câha şevher
    Zâde-i mecde peder pâdşeh-i dîne haten
  31. Alıcak hükm-i kifâ’etle arûs-ı sadrı
    Tâk-ı gerdûna yazıldı mesel-i vâfaka-şenn
  32. Vâye-bahş olsa eger tâb-ı süheyl-i cûdı
    Keştî-i Nûha döner âb-ı akîk üzre Yemen
  33. Düşse feyz-i nazarı âyîne-i fûlâda
    Jeng-i sad-sâlesi bir demde olur tâze çemen
  34. Hilmi sûret-dih-i ârâm-ı cihân olsa olur
    Katre-i zîbaka mir’ât-ı kürî üzre vatan
  35. Satvet-i kahrı eger eylese fermân-ı mesîr
    Mısrın ehrâmın eder kâğıd-ı bâd-ı melten
  36. Mîve-i bâğa sudûr etse eger zinhârı
    Tâ ebed kalır idi nakş-ı nebâtî ergen
  37. Beççe-i fahte-veş zâdesi tavk ile doğar
    Görse fermânını hâb içre zen-i âbisten
  38. Nehy-i esbâb-ı melâhîye k’ola tefrika-sâz
    Bulmaya haşre degin berbât-ı nâhid düzen
  39. Düşse bir lem‘ası ger barîka-ı satvetinin
    Âb olup yüz tuta sahrâlara kûh-ı âhen
  40. San‘at-ı rezmini gûş edene suhriyye gelir
    Harf-i Dârâ vü Sikender sühan-ı Gîv ü Peşen
  41. Cebhesi gülşen-i İslâma meh-i ferverdin
    Bâğ-ı bed-hâhına şemşîr-i hilâl-i Behmen
  42. Lutfunun bir şekerin handesi âb-ı hayvân
    Kahrının bir nefes-i serdi lehîb-i külhan
  43. Pâydârî eser-i şastına pek müşkildir
    Nüh felek cirmi kadar olsa siperlerde sıhan
  44. Darbe-i nîze vü küpâline tâkat güçdür
    Hod başı kaydını görsün gözün açsın cevşen
  45. Meh-i nev sanma görüp satvetini Behrâmın
    Düşdü destindeki zer-tûz kemân-ı Behmen
  46. Zihni çarh-ı nühüme râh-nümâ-yı sür‘at
    Merkez-i hâke vekârı nesak-âmûz-ı seken
  47. Gûşe-i çeşmi ki der-kâr ola meknûnâta
    Def‘aten kisve-i tahkîka girüp sûret-i zan
  48. Geçmeden sâye-i müjgânını nûr-ı nigehi
    Teng olur cilve-i esrâr-ı mezâyâ-yı alen
  49. Oldu bî-şâibe bürhân-ı lüzûm-ı aklı
    O yarâ‘ayla berâ‘at o lisân ile lesen
  50. O eder harfini ecsâm-ı me‘âlîye sûver
    Bu kılar lafzını ervâh-ı ma‘âniye beden
  51. O verir âb-ı hayât içre perî-zâda makâm
    Bu eder sath-ı hevâ üstüne tarh-ı gülşen
  52. Gâvı inletdi belin bükdü basît-ı arzın
    Zîr-i rânındaki pûlâd bilekli tevsen
  53. Habbezâ kûh-ı hırâmân-ı felek-peyker
    Bu kadar cism-i cesîminde salâbet var iken
  54. Başka bir âleme reh-bürde olup gûy-ı zemîn
    Gûşe-i sümmüne hasbîde kalır çün erzen
  55. Durup ammâ ki yine raksa ser-âgâz edicek
    Dest-i hâmun görünür çeşmine nevk-i sûzen
  56. O kadar şûh u sebük-pây ki görmez âzâr
    Na‘l ü mîh olsa eger şeb-nem ile berk-ı semen
  57. Vasfı tahmîn iledir gerdîşinin cümle hemân
    Var mı yohsa tek ü tâz eyler iken onu gören
  58. Ser-firâzâ âlem-efrâz u sipâh-endâzâ
    Ey ki ka‘b-ı himemin peyker-i keyvâna zekân
  59. Serde bir dâğ yakup nâmını hurşîd kodı
    İ‘tirâf etdi sana rıkkını gerdûn-ı kühen
  60. Mihr kim cism-i münevverdir deyü ta‘rîf olunur
    Sana yok nisbeti kim nûr-ı mücessemsin sen
  61. Şems ü işrâka şebîh tab‘-ı münîrinle zekâ
    Güher ü âba mesel tarf-ı zebânınla sühan
  62. Şîr ü şekker nesak-i hükm-i sitârenle sü‘ûd
    Âb u âteş hadak-ı dîde-i bahtınla vesen
  63. Satvetin şöyle zebûn eyledi ser-keşleri kim
    Kalmadı kimsede endîşe-i mekr-i düşmen
  64. Çıkup âgûşuna nahvetle ederler şimdi
    Mâde-i şîrden âhû-bereler mass-ı leben
  65. Âsâfâ girmedi hakkâ ki kef-i eyyâma
    Zât-ı pâkin gibi mecmû‘a-ı ahlâk-ı hasen
  66. Şu‘ârâ-yı selef evsâfına hasret gideli
    Etdi pür meclis-i ervâhı neşîd-i şîven
  67. Ne bilir perveriş-i ebr-i bahâr-ı feyzin
    Gül-i vasfın çemen-ârâ-yı bahâr eylemeyen
  68. Neyle zîb-efken olur gül çemen-i medhinle
    Etmeyen kilkini yek-pâre zebân-ı sûsen
  69. Yûsufistân-ı hayâl olmayıcak vasfında
    Neyle ma‘mûr ola hâtır denilen beyt-i hazen
    27
  70. Lâfı koy sen var iken arada billah Nedîm
    Baht-ı bî-çâreyi bî-hûdedir etmek mat‘an
  71. Dîde-i ibretin aç bağla zebân-ı gîleyi
    Kabz u bast-ı dü-cihan çünki bilirsin kimden
  72. Kalem incâ çü resed bih ki heman ser şikend
    Sühan incâ çü resed nâtıka bâyed elken
  73. Be-heme hâl dü dest-i men ü dâmân-ı rızâ
    Der-heme hâl men ü gerden-i teslîm ü kefen
  74. Gayri vakt oldu ki der-beste olup kâh-ı devât
    Kasr-ı dilden sû-yı bâlâya açılsın revzen
  75. Ahteran tâ ki edüp ceyş-i zalâm üzre hücûm
    Geçire kehkeşan gerden-i gerdûna resen
  76. Ola mâh-ı nev-i şemşîrine dâ’im matla‘
    Kal‘a-i düşmen-i dîn üzre olan burc-ı beden
  77. Câme-i fethe verüp kâmet-i azmin revnak
    Gerden-i hasmdan ayrılmaya hem-vâre kefen
  78. Ola iklîm-i ademden dahı sad merhale dûr
    Havl-i âvâze-i ikbâlin ile ceyş-i fiten
  79. Levm-i hussâddan âsîb-i nazardan dâ’im
    Eyleye zâtını mahfûz Hudâ-yı zü’l-men
  80. Tâk olup Kisrî-i ikbâline kavs-ı Rüstem
    Ola tecvîf-i felek düşmene çâh-ı Bîjen
  81. Fark-ı hurşîd ile gül-perçem-i tûğun yektûy
    Evc-i ayyûk ile mencuk-ı otağın yek-ten

3 – Kasîde Berâ-yı Sultân Ahmed Hân

  1. Habbezâ ey taht u tâcın mâye-i zîb ü feri
    Âlemin ârâyişi mülkün tırâz u zîveri
  2. Habbezâ ey tâc-bahşâ-yı Ferîdûn u Kubâd
    Habbezâ ey müttekâ-pîrâ-yı mülk-i Kayserî
  3. Habbezâ ey şu‘le-i şemşîr-i dest-i saltanat
    Ey fürûğ-ı rûy-ı hurşîd-i sipihr-i serveri
  4. Rahşın olmasa felek olmazdı böyle pür-şitâb
    Peykin olmasa kamer giymezdi bu tâc-ı zeri
  5. Avfa muhtâcım bu ta‘bîrimde taksîr eyledim
    Belki ey yektâ-neverd-i ser-zemîn-i dâveri
  6. Na‘l-i zerdir mûze-i peykinde mâhın gurresi
    Gûydur çevgân-ı pây-i rahşına çarhın seri
  7. Secde-ber mihrâb-ı na‘l-i esbine mâh-ı felek
    Müftehir bûs-ı süm-i rahşınla mihr-i hâveri
  8. Mükteseb yalmân-ı tîğından dırahş-ı âftâb
    Müntehab fass-ı nigîninden fürûğ-ı müşteri
  9. Şehriyârâ sensin ol ferman-revâ-yı dehr kim
    Âsman dergâhının bir bende-i ferman-beri
  10. Sâye-i bezmin celâl ü câhın âsâyişgehi
    Râ’yet-i azmin hümâ-yı devletin bâl ü peri
  11. Böyle tahrîr etdi levh-i mihre vasf-ı pâkini
    Kâtib-i çarhın ser-i kilk-i ma‘ânî-perveri
  12. Hırz-ı cân-ı saltanat nîrû-yı bâzû-yı zafer
    Rükn-i savlet unsur-ı haşmet esâs-ı saf-deri
  13. Hânuman-zîb-i celâl ârâyiş-i mecd ü şeref
    Seyf-i sârım bîşezâr-ı satvetin şîr-i neri
  14. Sûret-i akl-ı müşahhas peyker-i zihn-i selîm
    Akl-ı kül burc-ı kemâlin âftâb-ı enveri
  15. Ya‘ni Sultân Ahmed-i Gâzi ki dûş-ı kadrine
    Atlas-ı gerdun müzerkeş tügmeli bir anteri
  16. Şehriyârâ âsman-kadrâ hidîvâ dâverâ
    Ey eden kem-kadr hâk-i pâyi müşk-i ezferi
  17. Cüst ü cûy-ı ma‘nî-i vasfınla akl ü fikr ü fehm
    Geşt ederken zîr ü bâlâ-yı sipihri serseri
  18. Rast geldi peyk-i endîşem bu garrâ matla‘a
    Çarh-ı çârümden öte arş-ı mu‘allâdan beri
  19. Dest-i kahrından ruh-ı çerh-i kühen nîlüferî
    Bâğ-ı lutfundan behişt-i heşt bir verd-i tarî
  20. Âb eder te’sîr-i kahrın kûhsâr-ı âheni
    Ebr eder lutfun duhân-ı kûre-i âhengeri
  21. Şöyledir merdânegî zâtında kim hâb içre ger
    Bir gece görse hayâlin Zâl-i çarhın gözleri
  22. Erte meydân-ı recûliyetde bayrak-bend olur
    Nîze-i Behrâma nâhid-i sipihrin mî‘ceri
  23. Kabza-i teshîrine mevhûb kavs-ı Rüstemî
    Bâzû-yı ikbâline mevrûs zûr-ı Hayderî
  24. Mükteseb âdet değil hûy-ı cibillîdir sana
    Kâm-bahşî mekremet-kârî merâhim-güsterî
  25. Sensin ol sultân-ı âlişan k’olur bezminde cem‘
    Zührenin çengi mehin ibrıki mihrin micmeri
  26. Sensin ol dâver k’olur rezminde dâim kârger
    Kahramânın tîğı Sâmın gürzi Zâlın hançeri
  27. Olmasa eyyâm nâm-ı âlem-ârâna karîn
    Zahm ururdu sîne-i eyyâma mîm-i hançerî
  28. Saltanat baş urmayaydı dergeh-i ikbâline
    Tîğ-veş âzâr ederdi re’si lafz-ı efseri
  29. Cebhe-i pâkindeki berk-ı necâbetden eger
    Meş‘al-efrûz-ı cemâl olsaydı mihr-i hâveri
  30. Eyleyüp dünyâyı cûş-ı lücce-i envâra gark
    Arz olurdu mevce-i deryâ-yı nûrun anberi
  31. Verse bir sahrâya fer meşşâta-ı adlin olur
    Çengel-i şeh-bâz mîl-i sürme-i kebk-i deri
  32. Etse bir kûha güzer bâd-ı semûm-ı satvetin
    Ma‘den-i gûgird eder te’siri kân-ı gevherî
  33. Re’fetinden perveriş-yâb olsa bir gülşen biter
    Lâle-veş hâkinde feyz-i reng-i tâb-ı dil-berî
  34. Etse zîr-i sâye-i kûh-ı vakârın mültecâ
    Bend eder bâl-ı piristû-beççe râh-ı sarsarı
  35. Gülşeninden geçse bir takrîb ile tâ haşr olur
    Çârşû-yı gül-fürûşânın meges şehbenderi
  36. Olsa eltâfınla ger nefs-i nebâtî şehd-kâm
    İktisâb eylerdi hanzal lezzet-i gül-şekkeri
  37. Olsa bir şâ‘ir eger makrûn-ı lutf u re’fetin
    Böyle eyler kilki îcâd-ı perend-i şeşterî
  38. Pâdişâhım iki şâ‘irdir veren nazma revâc
    Merzbûm-ı Hindde Örfî Acemde Enverî
  39. Âlemi leb-rîz-i âvâz eylemişler vasf edüp
    Birisi Şâh Ekberi birisi Sultan Senceri
  40. Ben kulun da işte mülk-i Rûmda vasf eyleyüp
    Bir senin gibi şehenşâh-ı Ferîdûn-efseri
  41. Yâ nice vasf etmeyem kim dergeh-i cûdunda ben
    Olmuşumdur böyle bir lutf-ı amîmin mazharı
  42. Ya‘ni kıldın medreseyle abd-ı nâ-kâmın çerâğ
    Oldu câ nâm-ı Nedîme bendegânın defteri
  43. Husrevâne lutf edüp şâhâne in‘âm eyledin
    Dest-i lutfun sildi ağlarken bu çeşmân-ı teri
  44. Fahr iken ecdâdıma ol âstânın hidmeti
    Hazret-i Sultân Ebü’l-fethin zamânından beri
  45. Pâdişâhân-ı selefden bunca ihsanlar görüp
    Her biri olmuşken ol bâb-ı refî‘in çâkeri
  46. Ben kulun bî-kes muhakkar şöyle kalmışken yetîm
    Mihnet ü endûh ile ağlar gezerdim serseri
  47. Ne rikâb-ı devlete arz-ı merâma bir mesâğ
    Ne bu bâr-ı mihnete sabr etmeğe tâb-âverî
  48. Hak mü’eyyed eylesin dâmâd-ı âlî-şânını
    Âsman durdukça olsun zîb-i sadr-ı dâverî
  49. Kim bu bî-kes bendeni hünkârıma ta‘rîf edüp
    Eyledi bu derd-mendi mihnet ü gamdan beri
  50. Hak budur kim pâdişâhım böyle bir dânâ vezîr
    Etmedi bu ana dek zîbende hiç bir kişveri
  51. Hak Te‘âlâ devlet ü ikbâlin efzûn eylesin
    Tâbi‘-i fermânın olsun devr-i çarh-ı çenberi
  52. Mülkden dûr olmasın zıll-ı hümâ-yı re’fetin
    Dâ’imâ kılsın himâyet şefkatın bî-kesleri
  53. Arş ile hem-dûş ola tâk-ı revâk-ı haşmetin
    Tâ ki ber-câdır bu âlî-kubbe-i nîlüferî
  54. Sana temlîk eylesin Hak bir yere cem‘ eyleyüp
    Mülk-i dehri ömr-i Hızrı devlet-i İskenderi
Cevap bırakın

E-posta hesabınız yayımlanmayacak.